شفت الجبال منها البيوت بتطل
بس الجبال أروع كتير م الكل
شفت اللى لونها أبيض
زى القمر بالليل
وأنا كنت أشوفها
تشد فيّا الحيل
سبحانه من أبدع
ثابتة ومن غير ميل
شفت اللي لونها
لون عيون الشمس
كان قلبى يتحرك
ويتكلم ويّا الجبل بالهمس
كان الجبل ..
يقول
أسراره ما يخبّيش
يمر البحر من جارى
ومايهدّيش
أبل الريق بالميه
يدينى ما يكسفنيش
يعوز رمل من رملى
أديله
وما يمشيش
يعز عليه يفارقنى
فبنكمل ...
يكون جنبى ساعات دايماً
وأكون جنبه
وأحياناً
بنتباعد
وأحياناً بنتواعد
نشوف الدنيا بعنينا
وما تشوفناش
عشان
دايماً هنا بتاخد
ولا تدينا شئ ببلاش
وراح البحر عنوانه
وساب دمعه على خدى
وأنا رملى بيقيله سبيل
صديق يا بحر لصخورى
وقلبى دليل
وكان يخفى سنين عمره
بقُولْ مواويل
وجوة قليبه أحزانه
وحمْلُه تقيل
حبيب ليا يا قلب صديق
أكيد راح نلتقى تانى ..
لُقا يرجّع ف روحنا الريق
ليست هناك تعليقات:
إرسال تعليق